حالات بيعيشوها
(1)
كان نفسك تنده بعيونك
نظرات الغيره وتطلقها
لكن ماقدرتش تقنعها
انها تطلع من خفاياك
وتبوح بالمكنون جواك
حزن اللحظه لما تعدى
بتلومك عل الفرصه الضايعه
وتقولك : "باى باى يا حليوه
انا مش راجعه"
****************
(2)
شلت ايديك من الليله بحالها
وانت شايفها بتبكى بدمك
شايله داخلها جزئين منك
جزء بيعشق
جزء بيبغض
جزء بيعشــــق همس القافيه
فى الشعر اللى بخط ايديك
جزء بيبغـــض انسان تانى
جواها عايش
انت الطلقه
وهو الرايش
*****************
(3)
اخوك سعيد
راح يستلم مقاليد سريرك من بعدك
بعد اما كنت بتمنعه
من انه حتى يبات عليه
هيقلب فى مراتب الذكرى
ويكلم براغيت احلامك
اللى نســـيتها
هيـــــــــــفتتـــها
برواز ليــــــــــــــــل
(مصطفــــى نوبــــى)
